مسج للي يبي الكلام الليبي الموزون علي اصولة

جغرافى نشيط

دونك.. دونك..
عقوبة الخاين كيف في قانونك..
الخاطر استنجد بيك
دونك فزعة..
الغالي رحل مانظن عندا رجعه..
نهار خونته ياخوي شينك فجعه..
تصور بعد نصك الثاني يخونك..

***********

سبحان .. من قال؟؟!!..
سبحان من قال ينسى غلاهم ..
ويصبر بلاهم.. ويقدر علي كبر جرحه جفاهم..
سبحان من قال..ينسى حبيبه..
ويمشي بطيبه..ويقدر علي طول هجره وعيبه..
ويدفع بعد كل غلطه ضريبه..
ويحمل خطاهم.. ويصبر..
وما صبر نافع معاهم..
سبحان.. من قال؟؟؟!!...

***********

طالب الله يبقى المانع خير..
اريافي عليكم يا اعزاز كبير..
علينا غبتوا..
لا اللي وصل مرسال لا كلمتوا..
فكري انشغل واجد البال شغلتوا..
كملت ليلي في شقا وتفكير..
زعم ناويين الهجر ماعبرتوا..
انسيتوا غلا غالي بلا تفسير..

**********

كم من جرح جابوله طبيب..
وبعد الياس لقيوله دوى..
جرحي جرح نلقنه عطيب..
فيه غلبت شقاني شقا..
وعندي قلب .. في صبره عجيب ..
مل الجرح من هوله شكا..
وين انقول يزهالي قريب..
نلقا الياس تأثيره بدا..

*********

مانجبرك ع الحب والحنيه..
راهي المحبه بالوفا والنية..
مانجبرك عالحب يامحبوبي..
ولا انقولك لازم
ترومه صوبي..
ان درت الغلا هاضاك هو مطلوبي..
وان هنتني ماني عليك رمية..
ولا نجرحك لانشيل منك سية..

**********

مازال ما سَلّمتْ..
وما زال غيرك ما نهار فهمت
وانت نظر الانظار وين برمت
شريكاً وما منك طريق نجى
وانت جميل الحلم وين حلمت
وانت خطاوي العقل وين مشى
وانت الرفيق اللي معاه عزمت
خشوش المخاطر في فجوج خلا
وانت الحياة والموت وانت الصمت
وانت الكلام وجوهرا ومعناه
وانت رضا الولدين بيه غنمت
راحة الدنيا ساعة الملقى
وانت القاضي وين ليه حكمت
حواسي الخمسة مايحات معاه
نطق حكم بعد شهور له سلمت
بقولة مؤبد في سريب غلا

******
عندي ليل مطاول طويل
لا بان فجر لا صبحا ضوى
وعندي عقل في رايا ظليل
ننصح فيه ويدير الخطا
وعندي عين ما ترقد الليل
رفيقة دمع حرفتا بكا
وعندي قلب مجروح وعليل
نزيفا زاد ما فادا دوا
وعندي روح راغبة فالرحيل
بعد لولاف ما تريد الحياة
وعندي نفس مو ساهل تميل
جداب(جدب) وعز لا ذل وعفا(ربيع)
وعندي رجل ما لقيت سبيل
توصل بيه لديار الزها
وعندي دمع عالغايب يسيل
نزيل امطار في وان الشتا

******
يا رازينا
ويااللي بنارك فالغلا كاوينا
وياللي طمعنا فيك بيش تجينا
تمسح دموع العين وتفرحنا
ان كان عالبكا واجد عليك بكينا
خطينا الدوح وفي الخلا نوحنا
يا جارحنا
نسيت الغلا ننسوك حتى نحنا
زايد علينا بيش؟؟؟!!

*****

حنون معاي
لاتغيب عني ولا تهون غلاي
خليك يالغالي
حنون ووافي
وخليك ديما في حنانك صافي
انت النفس وانت هو دواي الشافي
وانت الغلا وانت حدود مناي
وانت اللي تعرف صحيح ريافي
وانت اللي تفهم نسيم هواي

******

سهرت الليل عديت النجوم
حسبت العين تابا للمنام
لقيت العقل غارق فالهموم
وبكا العين من كثر الملام
اليوم العين فالخاطر تلوم
الخاطر دار لومة عالايام
ونا محتار ما عندي عزوم
مغير الصبر ما عندي كلام

******

جغرافي خبير

جزاك الله خيرا سمرا
كلام جامد وموزون

جغرافى نشيط

مشكور سمراء
و تسلم ايدك موضوع مميز

المدير العام

ربنا يكرمك
كلام جميل فعلا
لا حرمنا الله منكي

زائر

جزاك الله كل خير يا سمراء
كلام جميل وموزون تسلم ايدك

جغرافي خبير

تسلم يدك حبيبتى على هالرسايل كتير حلوة وايد

جغرافى نشيط

مشكورين على مروركم وان شاء الله تكونوا فهمتوا اللهجه الليبية

مشرف

تسلم ايدك
بس هى المسجات دى مصرية ولا خليجية

جغرافى نشيط

المسجات باللهجة الليبية

مشرف