وصية سيجارة

جغرافى نشيط

وصية سيجارة

1-كايدة الرجال

والله فعلاً دى الحقيقة مش خيال
إن السجارة بهمها وبغمها
كايدة الرجال

قدامها بيكونوا عيال

والراجل اللى صوته عالى بينكتِم

ويطلـّع القرش اللى كان مستخسره فـ ابنه

ولا يسأل سؤال

من بعد ما الصحة تِروح
والقرش والحسنات كمان
إيه النهاية والمآل

راح أقولكم . . .

2- حديث سجارة

اسمع يا شاطر يا شطارة

أنا خالتك الست سجارة

سفيرة الموت بالجملة
فتـّح دماغك يا أمارة

معايا شنطة ومليانة
أمراض كتير اصحى معانا

سرطان وقرحه وباتوصـّى
واخدم زبونى بأمانة

دا غير بقا الكحه الناشفة
و زَراق منيـّـل عـ الشفــّـه

و إن كنت يا اسمك إيه خفه
تخسر فلوسك بالـقــُـفــّــه

دا خمسميت مادة فـ قلبى
من السموم خليك جنبى

إدفع فلوس تشترى حُبـّـى
وتموت معايـــا يا روح قلبى

دا تلوث أسنانك
واللثه تضرب ولسانك

وأم العيال تقرف منك
وجميع حبايبك وجيرانك

هتموت بسكته قلبية
وتطب ساكت يا عنيــّه

ويزيعوا نعيك يا ابو خالو
وتكــُـتّ مـ الدنيا فـ ثانية

أربع تلاف ومتين ماده
يرقــّدوك زى مخده

وبتر أعضاء وبلاوى
وذبحه صدرية وهــــدّه

و ان كنت فاضى ما لك عوزه
أو عضو شله منبوذه

وتـَمـَـلـّــى تقعد فى الغـُرزة
يبقى انت من أهل الجوزة

أنا مش هسيبك يا عِليشه
لو حتى لفـّوك بالخيشه

جاى لك على جناح السرعه
أختى الكبيرة اسمها شيشه

وأخويا بايب ومعسل
و نشوق يا واد إوعى تكسّل

وكلنا فى خراب بيتك
عايزين نشارك ونمثـل

و يوم وفاتك هنشـرّف
على القرايب نتعرّف

يمكن نلاقى زبون تانى
وعقله مجنون بيخرّف

آدى صرخة الست سجاره
سمـّـعتها لك يا معـدّل

يا ريت بقا يا بنى تفكـّر
يمكن امورك تتبــدّل

أول هام دى حرام يا بنى
وحرق للحسنات حاصل

وإن كنت ح تفلفص منى
إسأل فضيلة الشيخ واصل

دى فتوى منه مسموعه
وف المساجد مطبوعه

إن السيجارة وأخواتها حرام
حرام فى ديننا وممنوعه

بطـّـلها يا بنى لوجه الله
واعمل حسابه فـ يوم تلقاه

راح يسألك عن تبذيرك
ومالكش مالِك أمر سواه

بطـّـلها خلـّى الصحه تعود
وتبقى زى الواد محمود

عايش حياته متهنّى
وبصحه حلوه وعود مفرود

غـيـّر حياتك بالمره
وفلوسها حوّشها فـ جرّه

يمكن تحج لبيت الله
أو مره تعملك عُــمره

النهاية

جغرافي خبير

كلام جميل والله
بس هيا زى جزء من الانسان لازم يكون ملازمة والكل عارف ان دة مش اكيد بس دة اعقادنا وبيكون دايما في دماغنا وعارفينا انها غلط واضرارها بس الاقلاع عنها مش بالساهل وربنا يهدينا جميعا

جغرافى نشيط

شكرا يا وديع علي المشاركة
اعتقد فعلا ان التدخين امر صعب الابتعاد عنه بسهوله
بس لو كل واحد اخد عهد علي نفسه انه هيحافظ علي نفسه من اضرارها لان جسمنها ده عهده ربنا مديهلنا وان التدخين بدايه دماره وهيجره لحاجات كتيره وحشه
اظن ده هيبقي دافع ليه
وربنا يقويه علي بعده عنها

زائر

طب فى ناس لسة مشربوش سجاير وعارفين اخطارها نفسى اعرف اية اللى حببهم فيها
هل هية منظرة او فى شباب بيفكروها مرجلة
وهية مش كدة خالص والله
لو حكمت عقلك يستحيل هتقربلها انما الواقع اليومن دول وغالبا الشباب بشربها عشان يعرف الناس انة كبر خلاص وبقة راجل وعلى فكرة دى مش مرجلة دى بداية المعيلة

تسلم ايدك والله على الكلام الجميل

جغرافي خبير

انا مش معاك في كل كلامك لانى هيا بتيجى بحب الاستطلاع واعتقادات بس الاسف ان الواحد عارف انها غلط بس ربنا بيدى القدرة للانسان ع الصح والغلط وبعد كدا الدنيا هتعرفة ان دة صح ولا غلط والحاجات دى عايزة نية ومش من يوم وليلة

زائر

يا عم وديع

ولا تلقوا بايديكم الى التهلكه

معاك ان الواحد لة قدرة بس مش نسلم ليه كدة بسهولة
وربنا خلق لكل واحد عقل مش عشان يسلم لكل حاجة
ولية حب استطلاع طول ما هوة عارف انها غلط بل وانها هتدمرة
فى الاول والاخر
غلط
غلط
غلط

جغرافى فعال

كلامك صح
انا من الناس الى بتشرب سجاير
بس هاخد عهد على نفسى انى مش هشرب سجاير تانى
وان شاء الله هبطل السجاير
بس ادعولى انى استمر

جغرافى نشيط

موضوع جميل وانا الحمد لله مش مدخن و اصحاب كتير بطلوها علي ايدي
تسلم ايدك

مشرف

موضوع جامد ويستاهل المرور

المدير العام

موضوع جميل بجد
ربنا يهدي الجميع
اكيد كلنا عارفين اضررها بس الناس اللى بتدخن بتعمل نفيها مش واخدة بالها او مستكتره صحتها اللى ربنا مديهلها ومش عارفين انهم هايتسالوا عن الصحة دي.
ربنا يهدي الجميع لكل خير

مشرف

موضوع جميل يستحق المناقشة
انا عمرى ما شربت سجاير ولا عمرى هشربها انشاء اللة
بس نفسى حد من اللى بيشربو السجاير يقولى بيستفاد اية من شرب السجاير
غير خسارة الصحة والمال برضة بس اهم حاجة الصحة
يا ريت كل واحد يخاف على صحتة وصحة اصحابة اللى قاعدين جنبة وهوا بيشرب
لانهم بيتضروا اكتر منة

ربنا يكرمهم ويبطلوها

جغرافى نشيط

جميل اوى الموضوع ده يامونى
اللهم اهدى شباب المسلمين

جغرافي اصيل

الله كلام جميل

مراقب عام

الحمد لله

ربنا تاب عليا

من زمان

» اعترافات سيجارة
» وصية ام لابنتها
» وصية أم لابنتها
» عشرون وصية لتجنب القلق
» وصية سحلية فى يوم وداعها .. يا عينى ..