حل مسألة على مضروبات اسبراج بالشرح

مراقب عام

بسم الله الرحمن الرحيم

س: احسب السكان فى عمر

أ-فى عمر 32 سنة

ب- فى عمر 3 سنوات؟

طبعا ده بيكون رأس المسألة وبيدينا جدول معاه زى اللى جاى ده

فئة السن	السكان
اقل من 5	741984
5-	714369
10-	627146
15-	613932
20-	615079
25-	511630
30-	445981
35-	402162
40-	312816
45-	264596
50-	248143
55-	172923
60-	157292
65-	86140
70-	62568
75	50242
الجملة	6027003
غير مبين	41692
الجملة	6068695

وايضا فى المعطيات بيكون مدينا جداول تانية ودى بقا بتكون مضروبات اسبراج

طبعا انا مش هنقلها كلها هنا لانها بجد كتيرة اوى بس هيا فى الكتاب

هتلاقوا خمس جداول ومكتوب فوقيهم اسماء الجداول بالانجليش كما يلى

frist panal
next to frist panal
middle panal
next last panal
last panal

وطبعا فى الحل هقولكم لزمتهم ايه وبنستعملوهم ازاى

الحـــــــــــــــــــــــــــــــــــــــــــل

لحل هذه المسألة هناك بعض الخطوات وهى كما يلى

1- ننظر فى جدول الفئات العمرية اللى هوا مدهونا ملقناش فيه غير مبين يبقا خير وبركة

نبص بقا للجدول اللى هوا فى المسألة دى نلاقى مكتوب كل فئة وعدد السكان بتاعة الفئة دى جنبها فى الجدول

وفى الاخر عامل خانة مكتوب فيها غير مبين ومدينا جنبها عدد سكان الغير مبين ده كام

نعمل ايه

اولا هنعدل الجدول ده

علشان نتخلص من الغير مبين ده هنعمل ايه؟

فيه قانون للتخلص من الغير مبين وهوا كما يلى

عدد سكان كل فئة عمرية
____________________×100
جملة السكان بدون الغير مبين
اللى هيا اصغر جملة

والناتج اللى هيطلع على الالة الحاسبة هنضربه فى عدد سكان الغير مبين ونقسمه على 100
كما يلى
الناتج1×عدد سكان الغير مبين
______________________
100

ونفس الناتج على الالة الحاسبة هنجمعه على عدد سكان الفئة العمرية
والناتج اللى هيطلع ده هيكون عدد سكان الفئة اللى احنا عدلناها

طبعا هيكون فيه علامة عشرية
هناخد الرقم من غير العلامة ونقرب الرقم

ونحطه فى الجدول الجديد اللى هنسميه جدول الفئات العمرية المعدلة

يعنى بأختصار لو لقيت فى جدول الفئات العمرية اللى مدهولك عدد غير مبين بتعمل جدول جديد وتسميه جدول الفئات العمرية المعدلة

وتاخد كل عدد سكان فئة ولتكن فئة السن اقل من 5

هتاخد ععد سكانها وتقسمها على ÷جملة السكان من غير الغير مبين يعندى بدون الغير مبين

وتضربها فى 100 والناتج اللى هيطلع عتضربه × عدد سكان الغير مبين وتقسمه على ÷100
والناتج اللى هيطلع هتجمعه على + عدد سكان الفئة العمرية اللى هيا اقل من 5 مثلا

والناتج هتعمله فى الجدول الجديد قصا فئة السن اقل من خمسة

ونكرر الخطوات دى فى كل فئة عمريه حتى الفئة الاخيرة اللى هيا 75

والجدول المصحح اللى هنسميه جدول الفئات العمرية المعدلة كما يلى

فئة السن	السكان
اقل من 5	747117
5-	719311
10-	631484
15-	618179
20-	619334
25-	515169
30-	449066
35-	404944
40-	314980
45-	266426
50-	249860
55-	174119
60-	158380
65-	86736
70-	63001
75-	50590
الجملة	6068696

بعد تعديل الفئات العمرية كما سبق للتأكد منها نرى ان الجملة فى الفئات العمرية تساوى 6068696

وفى الجدول اللى كان فى المعطيات هنلاقى الجملة تساوى 6068695
طبعا هتقولوا فيه واحد زيادة وده علشان واحنا بنقرب فأكيد ممكن يكون فيه واحد زيادة او واحد ناقص بس اهم حاجة ان الجملة تكون على الاقل اول اربع او خمس ارقام مظبوطين

ثانيا : هنبص بقا على المطلوب هنلقيه بيقول احسب السكان فى سن 32 سنة
هنعمل ايه؟؟؟؟؟؟؟؟؟؟؟؟

بعد تعديل الفئة العمرية ننظرى ان الفئة المراد حساب سكانها فى المسألة وهى الفئة الاحادية 32سنة

حيث ان الفئة الاحادية 32 سنة تقع فى الفئة العمرية الخمسية من (30-34)سنة
وهى سميت فئة خمسية لانها تحتوى على خمس فئات عمرية احادية وهم الفئة الاحادية 30 سنه و 31 و32 و33 و34 سنة

ثم بعد ذللك نحدد فى اى جدول من جداول مضروبات اسبراج تقع هذه الفئة الخمسية هل هى فى

frist panal ولا next to frist panal ولا middle panal ولا next last panal ولا last panal

طبعا هنلاقى فى الجداول اللى جاية فى الامتحان مكتوب على كل جدول الفئات العمرية بتعته

هقولكم حاجة بأختصار

الجدول الاولfrist panal ده بيجيب مضروبات اول فئة اللى هيا من (صفر-4) سنوات

اول خانه بتكون فيها اول فئة وتانى خانى الفئة اللى بعدها وتالت خانها اللى بعد بعدها ورابع خانة اللى بعد بعد بعدها اى متاليه

الجدول الثانى next to frist panal ده بيجيب الفئة الثانية اللى هيا من (5-9)سنوات
بيكون اول خانة هى (صفر -4) وتانى خانة من (5-9) وتالت خانة من (10-14) ورابع خانة من (15-19)
اما الجدول الثالث اللى هوا middle panalده بيجيب الفئات الخماسية من (10-14) و (15-19)...................حتى الفئة الخمسية من (65-69) سنة

اى سنة تقع فى الفئات دى تكون مضروباتها فى جدول المدل ده

وتكون الفئة المراد حساب مضروباتها تقع فى نصف الجدول فى خانت الميدل ويسبقها الفئتان المتتاليتان لها فى اول خانة وتانى خانها ويليها الفئتان المتتاليتان بعدها فى رابع خانة وخامس خانه

اما الجدول الرابع next to last panal ده بقا بيجيب الفئة اللى قبل الاخيرة اللى هيا

يسبقها فئتان متتاليتان لها ويليها الفئة التى بعدها فى اخر خانة

اما الجدول الخامس والاخير وهو جدول last panal ده بيجيب الفئة الاخيرة فى الفئات العمرية وهى من (75-79)سنة

وبتوضع فى اخر خانة فى الجدول ويسبقها ثلاث فئات متتاليها بالنسبه لها

نيجى بقا للمسألة بتعتنا نلاقى انه عاوز حساب سكان فئة العمر 32 سنة؟

و32 سنة دى زى مقولنا بتقع فى الفئة الخمسية من (30-34) سنة

والفئة دى مضروباتها فى جدول الميدل هنقوم نعمل ايه

هننقل الجدول بتاع الميدل بانال ده فى ورقة الاجابة بنفس ارقامه كما يلى
middle panal

فئة السن	(20-24)	(25-29)	(30-34)	(35-39)	(40-44)
30سنة	-0.0128	0.0848	0.1504	-0.024	0.0016
31سنة	-0.0016	0.0144	0.2224	-0.0416	0.0064
32سنة	0.0064	-0.0336	0.2844	-0.0336	0.0064
33سنة	0.0064	-0.0416	0.2224	0.0144	-0.0016
34سنة	0.0016	-0.024	0.1504	0.0848	-0.0128

بعد نقل جدول المضروبات (middle panal)

يتم عمل جدول اخر يسمى جملة سكان الفئة الخمسية

حيث يحتى على جملة سكان الفئات الخمسية التى تم تعديلها فى جدول الفئات العمرية المعدلة

اما فى حالة اذا كان الجدول خالى من غير مبين يتم نقل الجملة كما بالجدول من غير تعديل

ويكون الجدول كأتى

فئة السن	(20-24)	(25-29)	(30-34)	(35-39)	(40-44)
30	619334	515169	449066	404944	314980
31	619334	515169	449066	404944	314980
32	619334	515169	449066	404944	314980
33	619334	515169	449066	404944	314980
34	619334	515169	449066	404944	314980

بعد الانتهاء من هذا الجدول من هذا الجدول يتم عمل جدول اخر يتم فيه

ضرب جملة كل فئة خمسية × مضروباتها بجدول الميدل

مع مراعاة اشارة السالب

يعنى كل مربع فى الجدول بالبلدى جدة هينضرب فى المربع اللى زيه فى جدول المضروبات

اى خدمة علشان اللى مش فاهم كدة يفهمها بالبلدى كل خانة هتنضرب فى الخانة اللى زيها فى الجدول التانى

وهنعمل جدول زى اللى هعمله ده وينحط فيه الناتج مع التقريب بحيث ميكنش فيه عدد فيه علامة عشرية لان مفيش سكان من ميه او من عشرة

يعنى لو الناتج مثلا طلع 15483.5

تقربه يبقا 14584

وصلت

يلا بقا نعمل الجدول بالصلاة على النبة كدة وادعولى كام دعوة حلوة

الجدول هيكون فيه ضرب كل فئة خمسية × مضروباتها مع مراعاة الاشارات علشان فيه نواتج هتطلع سالب وهنعمل خانة هنسميها عدد سكان الفئة الاحادية ودى هنجمع عدد سكان الفئة الاحادية وليكن 30 سنة واللى هيتجمع الارقام اللى جنبها افقيا ويتسجل فى الخانة الاخيرة دى وهكذا 31 و 32 و33 و 34 وفى الاخر هنجمعهم على بعض ونسميها الجملة

كما يلى

وهنسمية جدول جملة سكان كل فئة × مضروباتها بالاشارة

فئة السن	(20-24)	(25-29)	(30-34)	(35-39)	(40-44)	عدد سكان الفئة الاحادية
30	-7927	43686	67540	-9719	504	94084
31	-991	7418	99872	-16846	2016	91469
32	3964	-17310	114242	-13606	2016	89306
33	3964	-21431	99872	5831	-504	87732
34	991	-12364	67540	34339	-4032	86474
						الجملة /449065

طبعا علشان نتأكد ان الحل صح لازم الجملة دى = عدد سكان الفئة الخمسية اللى فى الجدول المعدل واللى هيا جملة سكان فئة السن من (30-34) سنة

هنبص هنلقيها هناك 449066 والجملة اللى طلعت هنا هنلقيها 449065

طبعا فيه ناس هتقول فيه واحد ناقص هقولهم لا كدة صح والواحد ده هتلقوه قل علشان التقريبات اللى احنا عملناها فى عمليات الضرب

وفى الاخر هتقولوا
اذا عدد السكان فى عمر 32 سنة = 89306
#

يلا بقا احسبولى السكان فى فئة عمر 3 سنوات ورونى الشطارة بقا
؟؟؟؟؟؟؟؟؟؟؟؟؟؟؟
حل مسألة على مضروبات اسبراج بالشرح 447-do3aa

حل مسألة على مضروبات اسبراج بالشرح 447-do3aa

جغرافى فعال

الله عليك يا شيتوس استاز واللهى

مراقب عام

ربنا يخليك يا باشمهندس

نورت المنتدى كله والله وشرف ليا ان يكون اول رد تشارك بيه يكون فى توبيكاتى ان

ربنا يوفقك يا رب

وعاوزينك تفدنا بقا بما انك فى رابعة مساحة بمواضيعك الفعالة

جغرافى نشيط

جامد يا شيتوس
بس الجدول الاول بيديلك جمله واحده بس وبعدين انت الا بتجيب الجمله التانيه
والفئه ميدل العمر فيها ما بين 10سنوات و64 سنه
وتسلم ايدك على الحل

مراقب عام

ههههههههههههه

بص يا فوكس لو ادالك جملة واحدة بس وفى الجول غير مبين

بطلع انت جملة تانية انك تطرح الجملة اللى بدهالك من عدد السكان الغير مبين

وبالنسبة لجدول الميدل ده انت بتقول بيكون من الفئات من 10 -64

دى فئات احادية يا عم فوكس

وانا قولت انه بيكون من الفئة الخمسية (10-14) حتى الفئة الخمسية (65-69) سنة

جغرافى نشيط

انت ما فهمتش قصدى فى الميدل انا قصدى ان الفئات بتبقى لحد سن 64 مش 69
والفئات خمسيه يعنى خمس سنوات ماشى يا شيتوس

مراقب عام

بص يا معلم فى الميدل لحد 69

مش 64 لان فى جدول النكست تو لاست يعنى اللى قبل الاخير بتكون بتحسب مضروبات الفئة (70-74) بس

وجدول الاست الاخير

بيحسب اخر فئة وهيا من (75-79)حتى ابقا جرب تحل واحدة

جغرافي اصيل

تسلم ايدك يا اخويا بجد ميرسى اوى بالعبيط

جغرافى فعال

ان شاء الله يا شيتوس انا عندى مواضيع كتيره ان شاء الله هبعت اللى اقدر عليه بس الواحد اليومين دول هيمتحن بقى وان شاء الله هظبطك لينكات برامج كتييرة جديده من على مواقع اجنبيه بس بعد الامتحانات عشان الوقت ضيق جداا جدا نا اسف يا شيتوس ......ا

مراقب عام

تسلملى يا ميمو يا حبى

نورت التوبيك يا غالى

بالتوفيق ان شاء الله

مراقب عام

لا ولا يهمك يا جمال ربنا يكون فى عونك

ويارب يكون المنتدى عجبك وانا عذرك ان الفترة دى فترة انتقامات اقصد امتحانات

ربنا يوفق الجميع

جغرافى فعال

تمام يا صاحبى على الشغل الجامد ده

رميت نفسك فى حضن سقاك الحضن حزن حتى فى احضان الحبايب شوك شوك يا قلبى

مراقب عام

من بعض ما عندكم يا ابو حميد

نورت التوبيك يا صحبى

ربنا يوفقك يا رب

جغرافى نشيط

بجد مجهود كبير اوى
جزاك الله كل خير
انا كنت فهماه بس كانت وقعه منى حاجات بس الحمد لله دلوقتى فهمتها

جغرافى نشيط

تسلم ايدك يا شيتوس على مجهودك الرائع

جغرافى نشيط

مضروبااااات إسبراج
إتصدمت والله
بس تتفهم بإذن الله
ربنا يجازيك خير يا شيتوس
تسلم ايدك والله

جغرافى نشيط

شكرا شيتوس انا اتأكدت من كلامك فى الكتاب صفحه296

مراقب عام

اوكى يا فوكس يارب بالتوفيق ان شاء الله لينا كلنا

والله يا جماعة اللى مش فاهم فيها اى كلمة وقرا الشرح المبسط مع المسألة دهيت وماشى مع الخطوات هيفهمها وهيعرف انها مسألة تافهة بس هيا بتاخد وقت بس مش اكتر

مراقب عام

جزاكم الله خيرا ونورتوا الموضوع

امة الله

ميدو شلبى

مونى

بالتوفيق ان شاء الله

مشرف

الف مليون ميرسى ليك يا شيتوس
ع المجهود الرائع ده
وربنا يوفقك ويوفقنا جميعا

مراقب عام

مشكور يا وزة

نورتنى يا صاحبى ونورت التوبيك

ربنا يوفقك يارب

جغرافى نشيط

تسلم ايدك يا شيتوس
بجد مجهود فوق رائع
جزاك الله كل خير
وبالتوفيق ان شاء الله

المدير العام

احمد باشا
والله انا مش عارف اقولك اية اصلى طول عمرك
فى انتظار المزيد من ابداعاتدك

حل مسألة على مضروبات اسبراج بالشرح 6cb4f246a9f2ddf5161bac5edd89fdc54g

حل مسألة على مضروبات اسبراج بالشرح 6cb4f246a9f2ddf5161bac5edd89fdc54g

مراقب عام

ربنا يخليك يا تايجر

هوا انا اقدر اتأخر عنك يا صحبى

ربنا يوفقك
نورت التوبيك

تايجر ونورا

جغرافى فعال

شكرا يا شيتوس
برنس والله