كلمات لم تخلو من اى بيت..................

مراقب عام

الام*ذاكر ساعتين بتركيز كأنك ذاكرت اليوم كلو (الغريب اما تقعد تذاكر سعتين يقولو و هي دي مذاكره.)

الاب*مذاكرة ايه دا اللى على السرير

الام*يا ابني تعالي اقعد معانا ولا انت مأجر اوضه جوه البيت ......

الام* يا خويا ياريتك حافظ الدروس اللى عندك زى ما انت حافظ الاغانى كده .

الاب* اعملى حسابك اول ما الدراسه تيجى الرسيفر هيتشال هو والتليفزيون

الاب*قبل الفجر: ارجع بات في المكان اللي انت جاي منه.

الام* لو كانت اللي علي التليفون طنط سلوي قوليلها ماما نايمة

البنت* ابقى قابلني بكرة تاخد بالجزمة وتاكل كل حاجة غصب عنك.

الاب* عيشه تقصر العمر والواحد هيلاقيها منين ولا منين وانا خلاص زهقت وجبت اخري وانا عارفه مش هترتاحو غير لما اموت.

الام*يابنى حرام عليك هات قناة الناس الشياطين ماليه البيت.

الام* امشى جاتك مشش فى ركبك .

* جتها نيلة الى عايزة ولد تيجى تتفرج .

الاب* متحطيش الموبيل جنبك و انت نايمه هيجبلك تخلف عقلي .

الام*ذاكر ياموكوس مش فالح غير فى الهيافه والكلام الفاضى.

الام* متتأخرش وهات عيش وانت جاى .

* هو ده اللي انت فالح فيه طول اليل والنهار قاعد علي الزفت الكمبيوتر بتاعك لحد مهيجلك تخلف عقلي منه .

الاب* كل يوم هات هات لمة ربيتلى الهتهات مع انى مش عارف

الام * هتذااااااااكر هتاخد عنية مش هتذااااااااااكر هتاخد بالجزمة

الاب*أوعا حد يضحك عليك ويقولك جرب السيجارة دي.

الاب*ابقى ورينى مين حينفعك فى الاخر من شوية الصيع الى انت مشيلى وراهم .

الام* قوم اقرا لك كلمتين ينفعوك .

الاب* وطي المدعوق ده شويه .

الاب* مش ملاحقه علي التليفون ولا الموبيل عملالي فيها الست المهمه.

الاب*برة البيت بتضحكى وجوة البيت لاوى لنا بوزك ............

الام*لما ما ترضاش تاكل في البيت:طبعا مانت اتعودت علي اكل بره .

الاب* عيـــب ... لازم تحترم اللي أكبر منك .

الام* لو شفت خناقه ما لكش دعوة بيها .

الاب* كريم دا عيل بايظ وماتمشيش معاه تاني .

الام* مين منى دي انتى كل يوم تصاحبي واحدة جديدة ؟.

الام* هياا الوزيرة معندهاش وزاره النهارده قومى يا حبيبتى الساعه10 .

الام* انته مبتكلش جزر ليه .. اجيبلك برتقانه. طب كلى سلطه .

الام* يبني بأسلوبك ده مش هتعيش معاك واحده .

الاب* قومي ساعدي امك ده اللي هيتجوزك أمه داعية عليه.

الام* اوعى حد غريب يديلك حاجه تاكلها و تشربها و تاخدها منه .

الام* يا ابني حرام عليك الى بتعمله فينا ده.

الابن* انا سايبالكم البيت وماشي ومش حتشوفوا وشي تاني .

الام* لمى هدومك انتى مش عايشة فى زريبة بكرة اشوف بيتك هيبقى ازاى خرابة طبعا.

الاب* وانت فاكر احنا مستنيين منك حاجه .

الام* المسلسل مش هينفعك ...قوم ..

الام* ابقي قبليني لو فلحتي ...بس ديما مش بيقلوا نقبلهم فينّ!!! غربيه .

الاب*مين اللي ساب باب التلاجة مفتوح.

الاب* كفايه رغي في التليفونات .

*لما
الولد او البنت ماتاكلش تقعد الام تقول وشك بقى عامل زى اللقمة المقمرة
هتتعبى ومش هتقدرى تروحى الكلية و هلف بيكى على الداكترة.

الاب* اطفي التلفزيون وقوم ذاكر ولا و خش اوضتك .

الام* ما فيش مذاكرة على المزيكا .. وازاى بتذاكر و البتاع ده شغال جنبك .

الاب* ماتتأخرش علشان عندك كلية بكرة بدرى.

الام* انا عارفة ازاى المك .

* انا : ياماما بقه ايه ده ؟؟؟

البنت ماما:مووو لمـا يــــــخدك .

الام* ده منظر اودة بني آدم ، انت عايش فيها ازاي؟.

الام* هو انا الخدامه الى فى البيت ده

الاب* الى يطلع من الاوضه يطفى النور وراه .

الام*أبوك عندك أهو اتصرف معاه .

الاب* اللي بيشيل قربه مخرومة بتخر عليه لوحده ..

الام* لو مش فاهم حاجه ارفع ايدك و قول للأستاذ مش فاهم .. متتكسفش .

الاب* يأبنى المذاكره مابتخلص .... نفسى اشوفك مره ماسك كتاب.

الام* اعمل حسابك مش هندخلك جامعه خاصه.

الاب* قالب ليلك نهارك طول الليل صاحى وطول النهار نايم طبعاً ما حضرتش ولا محاضرة ولا سكشن , وطول اليوم صايع بره البيت .

الام* مالكش دعوة بالسياسة .. وماتمشيش في مظاهرات .و امشي جوا الحيط .

الام* احمد ربنا الاكل الى مش عجبك ده فى ناس مش لقينه .

الام* قومي سخني الأكل لأخوكي.

الام* ابوكم كان دايم بيطلع الاول على الفصل... " لما كلهم كده امال مين الى بيطلع الاخير .

* ومن اشهر الجمل الى بتتقال كل يوم بعد الاكل :

اللي ياكل في طبق او يشرب في كباية يغسلها ما يركنهاش في الحوض.

* ( حضرتك راجع البيت متأخر و عاوز تتوه الموضوع وانت بتكلم مامتك )

الابن : ماما عاملة ايه مش عارف ليه حاسس انك وحشتيني يا ست الحبايب

مامتك : وحش اما يلهفك كنت فين ياد يا صايع انت ؟ ايه اللى رجعك متأخر امبارح ؟؟

المدير العام

جبت منين الكلام دا كله
بس بجد معظم الكلام دا بيتقال وبيتقال كتير كمان

مشرف

شوية كلام بيتقال في كل بيت و شارع مصري

متعوب علية و متنقي على الطبلية كمان

دى يا جماعه جمل ونصائح بتتقال فى كل بيت مصرى واتحداكم لو فى حد مصرى مبيتقلوش الكلام والنصائح دى ...

*مش عايزه اسمع صوت

*ماتردش عليا بس الجمله دى لو التزمت بيها هتنفعك فى المستقبل عشان هتكسب مدير عملك

*تقعد فى اول صف قدام السبوره
*ومالها الكتب بتاعه الوزاره ؟
*بص كويس وانت بتعدى الشارع
*لو مش فاهم حاجه ارفع ايدك وقول للاستاذ مش فاهم
*متتأخرش بعد المدرسه وتقعد تصيع مع اصحابك
*افرد ضهرك وانت قاعد
*متمشيش حافى فى السقعه دى
*انت بتذاكر ازاى والبتاع دا شغال جمبك
*صليت العصر (اشمعنى العصر الله اعلم)
*اللى بيشيل قربه مخرومه بتخر على دماغه
*اطفى التليفزيون وقوم ذاكر
*اقفل صدرك تاخد برد
*كل على مهلك ... ومتاكلش وانت واقف وكل من قدامك
*كفايه رغى فى التليفونات
*متقعدش قدام المروحه وانت مستحمى
*وانت فاكر ان احنا مستنيين منك حاجه؟؟
*متعليش صوتك
*بلاش لعب فى الشارع
*بلاش لعب بلمقص .. بيجيب الفقر
*المسلسل مش هينفعك قوم نام
*ابقى كلمك خالتك عيانه اسأل عليها
*اوعى حد غريب يديلك حاجه وتاخدها
*اوعى تكدب عليا تانى مره
*لو شفت خناقه ملكش دعوه بيها
*كلمنا لما توصل
*عيب لازم تحترم اللى اكبر منك
*انت فاكرنا ناميمن على ودانا ؟
*وطى الزفت دا شويه (التليفزيون)
*لو فلحت ابقى قابلنى
*قوم اقرالك كلمتين ينفعوك
*ايه اللامبالاه والاستهتار اللى انت عايش فيهم دول
*انت فاكرنا لاقيين الفلوس دى فى الشارع
*والله مانت فالح وادى دقنى اهى
*ماتلزقش عينك فى التليفزيون كدا عشان نظرك
*متتكلمش بصوت عالى فى الحمام
* دا انا كنت بذاكر على عمود نور فى الشارع ولا على لمبه جاز ونجحت وخدت الدكتوراه ..........
*يا بنى محدش بينفع حد
* (هقطم رقابتك ..هقطعلك لسانك.. هدبحك دبح ..دانا هقطعك)
*ربنا يرزقك بعيل يوريك اللى ورتهولى
*متطلعش على الملايه وانت رجليك مش نضيفه

عطلع ايدك من جيبك وانت بتكلمنى واقف كويس