لسة في الكلية أو اتخرجت وعايش في فراغ؟ عايز ترتبط بواحدة ومحتار؟ إدخل هنا

جغرافى نشيط

ازيكوا يا شباب

في الحقيقة أنا لقيت موضوع دة بيدور في زهن كل شاب وخاصة انى اعيش التجربة دى فعلا فحبيت اقول شوية اقتراحات ياريت تقولولى رايكم اية

فكل شاب بيسأل انا عايش في فراغ وانا في الكلية أعمل إيه؟؟

أو انا اتخرجت ومش عارف إيه الخطوات اللي أقوم بيها دلوقتي ولا عارف هدفي

سؤال تاني بيتكرر برضه أنا عايز أرتبط بواحدة أعمل إيه؟؟؟

إيه اللي أقدر أعمله عشان الارتباط ده ما يفشلش قبل ما يبدأ؟؟

طبعا زي مانتو شايفين كده الموضوع انقسم لاتنين

الارتباط والفراغ

ولأن ليهم علاقة ببعض هتعرفوها من خلال الموضوع

فحبيت أعمل الموضوع ده عشان يفيد كل الشباب

وأتمنى فعلا إنه يفيدهم بجد

في البداية لازم نعرف إن الموضوع ده أولا وأخيرا هو تفكير بالعقل أكثر من القلب

وده برضه هتعرفوه من خلال متابعة الموضوع

نبدأ أولا بالجزء الأول من موضوعنا وهو

الفراغ وخطوات المستقبل الجيد

الخطوات اللي المفروض يمشي عليها كل شاب واللي من المفضل تكون من أيام الكلية

عشان بعد كده تساعده في مستقبله

كتير من الشباب بيكون عايش في فترة الكلية أو من بداية تانية ثانوي لحد الكلية

في حالة من اللا وعي

يعني إيه؟؟

يعني عادي الأهل بيصرفوا عليه وهو مش شايل هم حاجة وعايش الدنيا بالطول وبالعرض

وفجأة بعد ما يتخرج يتصدم بالواقع المرير

أنا آعد على الرصيف ليه؟؟

ما فيه ناس زيي ومتخرجين معايا واشتغلوا

إشمعنى أنا؟؟

وممكن كمان الشباب ده مايفوقش بعد التخرج
ده ممكن يوصل لسن 28 و 30 ولسة للأسف ما فاقش

غير كده كمان في الكارثة

بعض الشباب مش بس عايشين في لا وعي

لا وكمان بيشربوا مخدرات (بيحششوا يعني وبانجو وكلام من ده)

يعني ولا بيشتغلوا ولا فارق معاهم

وبعضهم ييجي وقت معين تلاقيهم مزهولين (وقت مايلاقوا حب حقيقي صادفهم)

أنا عملت إيه في دنيتي؟؟

أنا ضيعت العمر ده كله من غير أي فايدة؟؟

يا ترى انا هقدر أتجوز ازاي دلوقتي؟؟

هقول لأهلها إيه وهتجوز منين وازاي؟؟

ولو الشاب مش فارق معاه حاجة طول حياته دي مأساه لوحدها
مش هنتكلم فيها دلوقتي

دلوقتي الموضوع ده للشباب اللي عنده استعداد يفوق

عنده استعداد يغير حياته عشان وقت مايحب يرتبط أو يتجوز

يلاقي نفسه واقف ثابت وواثق من نفسه

للشباب اللي عنده إرادة لكن مش عارف يوجهها ازاي

لسة ماعندوش إرادة أو ممكن نقول مافكرش في الموضوع غير قليل
وعايز حد ينصحه أو يوجهه

الناس اللي لسة في الكلية (أو اللي اتخرجوا)

حاسين بفراغ وقت الأجازات أو وقت الفراغ؟؟

الحاجات اللي ممكن تفيدكوا كويس جدا كالتالي

أهم حاجة يا جماعة الكورسات،
وماحدش ييجي يقولي لا انا الانجليزي بتاعي كويس مش محتاج كورس ولا بتاع
هقولك طيب تمام الانجليزي كويس ادخل أي مركز معتمد
وروح اختبر نفسك انت في المستوى الكام
وطلع منهم شهادة على الأقل بالمستوى اللي انت فيه لو مش عايز تزيد عنه
وده لأن انتوا عارفين بلد الشهادات ومش بس مصر،
حتى لو فكرت تسافر برة لازم يكون فيه إثبات على قدراتك،
إيه اللي هيثبت للي هتعمل معاه الإنترفيو انك فعلا كويس
هو مش هيضيع وقته في المقابلة عشان يعرف انت فعلا فاهم انجليزي وللا لا،
لازم يتأكد من شهادة تثبت ده وبعدها يبقى يعمل معاك المقابلة،
وطبعا ده بينطبق على ناس معينة مش كل الشركات بتعمل كده

طبعا غير كورسات اللغة كمان كورسات تدعم الدراسة اللي انت بتاخدها

لو انت مقتدر ماديا ممكن تاخد كورسات كويسة جدا تفيدك لو فرضنا انك في اداب مساحة

فيه كورسات جامدة جدا في الرابطة
مجرد ماتكون معاك أكيد هتشتغل في مكان كويس إن شاء الله

المنحة الكندية وغيرها من المنح اللى بتعلن عنها الرابطة

*********

ولو انت مش مقتدر ماديا فيه منح دراسية

زي منحة ITI لو تسمعوا عنها للخريجين التسع شهور وماتدفعش فيها ولا مليم

بس تمضي على إقرار بـ 15000 جنيه لو سيبتها في نصها وده لما تخلصها بيتقطع

ودي منحة في جميع تخصصات الكمبيوتر حسب ما تختار انت المجال اللي تحبه

منحة ICDL من وزارة الاتصالات ودي مش شرط تكونوا اتخرجتوا مدتها 3 شهور

وده لينك التقديم فيها

[ندعوك للتسجيل في المنتدى أو التعريف بنفسك لمعاينة هذا الرابط]

أو ممكن تسأل في أي مركز كمبيوتر معروف في محافظتك وتسأل عندهم منحة الـ ICDL

بس يستحسن تشترك في الموقع وتختار الشركة اللي قريبة منك

هيجيبولك رقم تليفونها تتصل بيهم وتروح

ودي بتكون بمبلغ تأمين 120 جنيه تاخدهم لما تيجي تاخد الشهادة بتاعت الـ ICDL

وحاجات كتير

حد ييجي يسألني مثلا

مانا أعد مرتاح في بيتنا إيه يجبرني أتعب نفسي في دراسة تانية؟؟

أرد عليك بقى بالجزء التاني من الموضوع

كل واحد من الشباب لازم يكون عنده عزيمة إنه يعمل حاجة في حياته

عشان مستقبله، عشان لما يفكر يرتبط أو يتجوز،
عشان ما يبقاش زي اللي أعدين من غير شغل ولا هدف في الحياة

كل واحد يحاول يعمل اللي عليه وإن شاء الله ربنا هيوفقه لما فيه الخير

الجزء التاني من الموضوع

الارتباط والوقت المناسب وبعض النصائح

كتير تساؤلات من الشباب

أنا نفسي ارتبط بواحدة أعمل ايه؟؟ أقولها؟؟ هتستناني؟؟

تعالوا نفكر بعقلنا قبل قلبنا في الموضوع ده

واحد دلوقتي لسة شاب في الكلية

أو اتخرج خلاص

اللي بيفكر يرتبط مش لازم يكون أد الفكرة دي الأول؟؟

السيناريو اللي بيحصل كالتالي

واحد يعجب بواحدة يقولها أنا عايز ارتبط بيكي.. شوية بعد سنة وللا اتنين

يكتشف انه مش جاهز دلوقتي وإن اللي كان مخططله اتلخبط

يروح يقولها معلش احنا لازم نسيب بعض (أصله طيب وابن حلال مش عايز يظلمها معاه)

أمال هو عمل إيه من الأول ما هو كده ظلمها

هييجي واحد حسن النية يقولي لا

أنا ما ظلمتهاش، انا لما طلبت الارتباط كان هيبقى فيه فرصة عمل كويسة
كنت هقدر منها أعمل مبلغ وكنت هـ وكنت هـ..

بس في الآخر ده ما حصلش

يبقى لازم قبل أي حاجة تكون حاطط رجلين على خطوات ثابتة ومعروفة
مش حاجة مستقبلية باني عليها حياتك

قبل ما تفكر في الارتباط فكر الأول لو الحاجة اللي انت متصور انها هتحصل دي ما حصلتش

هل هتقدر تعمل حاجة؟؟ وقت ما تيجي ترتبط هل وقتها تقدر تتقدم لأهلها؟؟

مش هتقدر تتقدم لأهلها وتشرح ظروفك وتلاقي قبول يبقى خلاص بلاش من الأول

ليه تظلمها وتظلم نفسك؟؟

سيناريو تاني بدل ما هو يقولها اسيبك عشان حرام أعلقك معايا

واحد يلاقيها اتخطبت بعد ارتباط كام سنة وحب سنين ومش عارف إيه

طيب ماهو مش كل البنات هتقدر تستنى

ولو قولنا إن البنت كويسة (أهلها عايزين مصلحتها من وجهة نظرهم مش هيخلوها تستنى)

مش هقول لازم يكون معاك شبكة بمش عارف كام ولا شقة تمليك ولا الكلام ده

بس على الأقل يكون معاك مبلغ تجيب بيه دبل

وتكون في شغل ثابت مرتبه ممكن يأجر شقة ويعيشها كويس مش على الرصيف

الشغل ده بقى بالمرتب ده ييجي منييييييين؟؟
من الحاجات اللي قولناها في الأول.. إنك تكون متميز عن باقي زمايلك بالكورسات اللي خدتها

إنك تكون طموح وعندك هدف في الحياة ماشي وراه عشان تحققه

يبقى هنا أهم خطوة لما تحب ترتبط بواحدة هي إيه؟؟

تشوف الأول ينفع تتقدم لأهلها وللا لا

مش هينفع بأي شكل خلاص ما تتعبش نفسك وتتعبها معاك

تطلب منها ارتباط وبعد كده ترجع تقولها اسيبك عشان ماعلقكيش
مانت علقتها خلاص تسيبها بعد إيه؟؟

ده بالنسبة لتعمل إيه قبل ما تفكر في الارتباط

طيب انت دلوقتي ما فكرتش لسة في الارتباط

تعمل إيه بقى عشان لما تفكر ترتبط تكون أدها؟؟

وده إجابته الجزء الأول من الموضوع
واللي كنا بنتكلم فيه عن إن المفروض إنك تمشي بخطوات طموحة في مستقبلك
عشان وقت ماتفكر في الارتباط تلاقي نفسك جاهز ليه رسمي
مش ترتبط في الضلمة وموضوع يفشل لأي سبب من الأسباب

وماحدش يقولي لا مش في الضلمة دانا أهلي عارفين

طيب أهلها هي عارفين؟؟ أبوها وأمها؟؟ وللا واحد بس فيهم؟؟ وللا ولا واحد؟؟ لا؟؟
يبقى في الضلمة مش في النور

أتمنى إن الموضوع ده يفيدكوا حقيقي

وأتمنى تشاركوني فيه بالمناقشة

جغرافى نشيط

يعنى انا مثـلا مدرب فى الهيئة العامة للطرق والكـبارى
ومدرب فى رابطة المسـاحة والخـرائط فى اسكندرية
وواخد ICDL UN
وواخد 9 مستويات انجلش عملت تحديد مستوى دخلت عال 9 خلصتة وامتحنت فية وطلعت شهادة
وبعد المشروع باذن الله تعالى هاخد كورس فرنـساوى وهروح اتعلم سواقة العربيات لان المسأاحة من غير ما يعرف يسوق ذى الراجل من غير رجل والله والكلام دة من ناس شغالة ومسـافر
اية مشكلتكم؟ يا جماعة لما تبدؤا من دلوقتى انا مش لقيت حد ينصحنى وانا فى الفرقة التانية كان زمانى اخدت حاجات تانية احسن واحسن لية؟ انتوا مش بتتحركوا غير لما الوقت ياذن عليكم
وبعد التخرج كمان هاخد دبلومة نظم معلومات جغرافية

مراقب عام

اولا

موضوعك جاااااااامد جدا يا ابو صلاح وموضوع مميز بجد اولا كلامك صح المفروض اللى فى الكليه يشتغل اى حاجه تساعده هو ذات نفسه فى المصاريف جيبه فى بعض الشباب يقولك يا عم شغل ايه انا فى الكليه بس دا المفروض انك تعمله حتى علشان تصرف على نفسك ومعاك فلوس فى جيبك وانتا ماشى

ولو انتا عارف انا كنت بسال على الكورس دا ورايح ان شاء الله اقدم فيها

ثانيا انتا دلوقتى الايام دى متلقيش انتا معاااك شهاده ايه انتا معاااك فلوس قد ايه

عندك شقه

عندك وظيفه ثابته ومرتب

تقدر تصرف على الانسانه اللى هترتبط بيها ولا لا

اولا كلمه بحبك دى مش سهله وربناااااااا دى مسئوليه كبيره

متتقلش للاى حد

لما تقولها لحد تبقى المسئول تماما على الكلمه اللى قولتها وعندك استعداد كامل ان الانسانه اللى قولتلها بحبك دى بتشركها فى حياتك تجتهد بكل طاقتى علشان تسعدها وعلشان تسعد نفسك معاها او بوجودها والمسئوليه مش فلوس المسئوليه هى انك تحترمها وتشاركها فى مشاكلها

بجد يا قاااااااااااضى توبيك مميز جدااااااااااااااااااا

استمر

ارفعلك القبعه وانحنيلك

مراقب عام

بص يا قاضى اولا الموضوع بتاعك ده بجد من غير مبالغ من اجمل ما قريت هنا فى المنتدى

سيبك من الحب والكلام ده

انا بتكلم عن الاجتهاد وازاى ابدأ وانا لسه فى الدراسة ونظام الكورسات والدورات والمنح

بجد الحاجة دى كويسة جدا وكمان من جهة بتفيد فهيا من جذور الافادة ومن الاساسيات اللى الواحد لما يروح اى شغل اكيد هتتحسبله وهتكون فى اولويات اختيارة واجتيازه

وبجد عجبنى طرحك للموضوع فى التوبيك ده

وكمان ترتيب افكارك اللى هيتبنى عليها بعد كدة مستقبل الواحد مننا

واكيد ربنا مش بيساوى واحد اجتهد من واحد كبر دماغه واعتمد على الكلية وبس

واكيد فيه امتيازات لكدة

وبجد النصايح بتعتك دى انا استفدت منها كتير

واكيد ان شاء الله هيكون ليا نصيب انى اعمل كدة ويمكن زيادة شوية ان شاء الله

وربنا يقدم اللى فيه الخير

وبجد مرة تانية ميرسى عالعرض الرائع ده

تسلم ايدك

وتقبل مرورى

المدير العام

انا بحاول ارد من الصبح ومش عارف الرد مش راضي يوصل ليه

المهم انا كنت كتبت رد طويل قوي

بس يا خسارة ما وصلش

بس ملخصةه ان موضوعك ممتاااااااااااااااااااااااز من الدرجة الاولى ومحتاج وسام كمان

تاني حاجن انا استفدت كتير من الكلام دا وانا كنت مكسل في موضوع الكورسات دا بس بعد ما قريت الكلام دا انا ان شا ء الله مش هاكسل تاني واهاحاول اخد دورة واتنين وتلاتة باذن الله

يللا

بيس يا عويس

مراقب عام

وربنا شكلى هطخك انتا وعويس بتاعك دا

جغرافى نشيط

بجد موضوع رائع يا أبو حميد و فعلا لازم الواحد يخطط كويس لمستقبله عشان لما يرتبط بواحده ميظلمهاش معاه
لأن الحب و الأرتباط ده مش لعبه بل مسئوليه و مسئوليه كبيره كمان و لازم نخططلها كويس عشان منرجعش بعد كده نندم علي اي حاجه و لأن الأرتباط ده محتاج مصاريف و مرتب ثابت ووظيفه يعتمد عليها و أنا عن نفسي عجبني اوي كلامك عن الدورات ده و أنا و الحمد لله لسه في سنه أولي بس رحت سجلت نفسي في دوره Icdl عشان فعلا مينفعش الواحد يعتمد علي الكليه و خلاص عشان ان شاء الله لما الواحد يخش مساحه و يتخرج و يجي يشتغل يكون معاه الرخص دي عشان يتأهل لأي وظيفه محترمه مناسبه ليه في المساحه

تقبلو مروري

Geo_sea

جغرافى نشيط

مـاشى بس خدها انجليزى بقى يعنى خدها icdl un مش icdl egyاوكى العربى ملهاش اى لازمة ولو انتة وقتك فاضى وفعلا انتة الفرصة قدامك سيبك من الاى سى دى ال وخد دورة اسمها **اوراكــل**

وعليك بقـى باللغـات

1_english

2_french

جغرافى نشيط

تسلم يا أحمد علي الأفاده

و هي الأوراكل احسن من Icdl يا أحمد؟؟؟؟؟؟؟؟

يا ريت تجاوبني بسرعه

جغرافى نشيط

بكتير يا حمادة اصل انا عايز اقولك حاجة ومش بحطمك والله انتة مش هتعرف تخلص الاوراكل دى لانها صعبة موت
بس بالارادة وبالطموح تخلصها هية كبيرة و7 مستويات بردك ذى الاى سى دى ال بس الاوراكل يا ابنى خـرافة يا ريتنى لقيت اللى ينصحنى وانا فى الفرقة الاولى كان زمانى وانا فى رابعة دلوقتى والله معايا CVجـــــــــــــامد

جغرافى نشيط

الله يخليك يا أحمد
والله بجد مش عارف اقولك ايه
بجد انت افدتني كتير
علي العموم الف شكر يا برنس
وربنا يجيب اللي فيه الخير لينا جميعا يا رب

» عايز حل
» حد راح الكلية
» الظابظ عبودة فى تانى زيارة له فى الكلية الحربية يوم الخميس 4/11/2010 ان شاء الله (احمد ابو الهوى)
» المفاجاة الكبرى الكابتن عبودة والصور كلها فى الكلية الحربية على فيديو كليب اهداء احمد ابو الهوى
» ترقبوا قريبا الزيارة الثالثة للظابط عبودة فى الكلية الحربية حصريا تانى ايام عيد الاضحى المبارك